Ef eitthvað getur farið úrskeiðis þá fer það úrskeiðis

Ynjan andar samkvæmt ýtrustu leiðbeiningum Jóga þessar stundirnar.
Ynjan á flug til fyrirheitna landsins á sunnudag, sem fyrir þá sem ekki eru sleipir í vikudögunum eftir tvo daga. Allt væri það ljómandi og blessað ef vegabréf ynjunnar væri komið í hús.
Hún sendi það til Danmerkur og nú vill það ekki koma heim. Ynjan á orðið góðan vin sem vinnur hjá íslandspósti sem hún hringir reglulega í til að fá nýjustu upplýsingar. Þær eru sjaldnast til staðar. Ynjan er vongóð og veit að í ljósi þess hve réttlát hún er þá kemur vegabréfið í dag. Samt skilur hún ekki alveg af hverju það rignir núna!

Þessi póstmál höfðu slík áhrif á ynjuna að hún vaknaði fyrir allar aldir. Sjaldgæft. Því ákvað hún að skella sér í bakaríið fyrir sig og Ljóna. Hún skellti sér í ,,slappaafbuxurnar" sínar og bol, vitandi það að svo snemma morguns væri ekki nokkur maður á ferli og hvað þá í bakaríi.
Þegar hún gekk inn í bakaríið voru þar á að giska fjörutíu iðnaðarmenn og einhverjar konur. Ynjan hefur aldrei skilið af hverju fólk vaknar fyrir hádegi og enn síður af hverju það er í bakaríinu þegar hún er að laumast út í mjög óviðeigandi fatnaði.

Ef þið hafið sambönd innan Íslandspóst þá hefði ég ekkert á móti því að þið nýttuð ykkur þau í dag í mína þágu.

Ynjan frá Kasmír